Conspectus rerum Latinus 18/2006
20 Dec 2006, 10:24
CONCILIUM EUROPAEUM PRINCIPIIS UE AMPLIFICANDAE OPERAM IMPENDIT
Concilium Europaeum, dum diebus 14-15 m. Decembris Bruxellis conventum agit, de principiis UE amplificandae penitus disputavit. Moderatores civitatum aut regiminum, quid de processu amplificationis consentirent, publice dixerunt: amplificationem etiam postea prioritatem potissimam fore et nullo modo fieri posse, quin Unio Europaea unio aperta esse pergeret.
Participibus praeterea duo alia themata maximi momenti erant: una erat quaestio, quanam ratione de negotiis ad iustitiam et res domesticas pertinentibus efficacius decerneretur, alterum thema ad politicam immigrationis spectabat. Concilio Europaeo placuit, ut renovatio processus decernendi partem illarum consultationum constitueret, quae de Tractatu renovando proxime fierent. Idem Concilium etiam de politica immigrationis Europaea statuit et de actionibus anno 2007 futuris consensit: cooperatio cum aliis civitatibus melior redderetur, plus pecuniae in confiniis custodiendis collocaretur, facultas Unionis ad subitas immigrantium multitudines coercendas corroboraretur.
Colloquia diurnariis edocendis, quae diebus Iovis et Veneris interretialiter coram emissa sunt, in archivio posita videri possunt in www.eu2006.fi.
www.eu2006.fi/calendar/vko50/fr_FR/1147268977319/
FINNIA PROPOSITA PRINCIPALIA PERFECIT
Praesidentia UE Finnorum anno exeunte finem capiet, quam ob rem Finni die Veneris, 15 m. Decembris, cum Concilium Europaeum Bruxellas congregatum esset, summarium rerum inter praesidentiam suam gestarum divulgaverunt:
Finnis UE praesidentibus argumenta principalia fuisse amplificationem, politicam energiae, competitionem usque acriorem, pugnam adversus mutationem climatis, Orientem Proximum, cooperationem inter UE et Russiam intercedentem. Finnos eo, quod perfectum esset, contentos esse.
CONSPECTUS RERUM LATINUS
Proximus conspectus Latine divulgabitur die Mercurii, vicesimo septimo m. Decembris.
Redactores praesidentiae UE Finniae ab interreti omnibus legentibus Bonum Festum Nativitatis Domini exoptant!
