Conspectus rerum Latinus 16/2006
04 Dec 2006, 09:39
CONVENTUS MINISTRORUM INOFFICIALIS: COOPERATIO EUROPAEA IN PROFESSIONALI EDUCATIONE ET EXERCITATIONE, HELSINKII DIEBUS 4-5 M. DECEMBRIS
Ministri, quorum est professionalis educatio et exercitatio in Unione Europaea, diebus 4-5 mensis Decembris Helsinkium convenient, ut duce Antti Kalliomäki, ministro educationis et scientiae, inofficialem conventum ministerialem agant.
Ministri communicationem Helsinkiensem comprobaturi sunt, qua adumbratur, qualis politica communis ad professionalem educationem et exercitationem pertinens annis proximis futura sit. In conventu de loco, quem professionalis educatio et exercitatio in Europa habeant, disputabitur atque metae constituentur, ad quas cooperatio illius campi Europaea proximo biennio tendat. Cooperatio in professionali educatione et exercitatione est pars Processus Havniensis, cui respondet Processus Bononiensis educationis altioris.
www.eu2006.fi/calendar/vko49/fr_FR/1147267559768/
CONCILIUM COMPETITIVITATIS BRUXELLIS DIE 4 M. DECEMBRIS
Concilium competitivitatis Bruxellis die quarto m. Decembris conventum aget, cui praesidebit Mauri Pekkarinen, minister commercii et industriae Finniae.
Ministri de multiplici strategia innovativa colloquentur et conclusiones de prioritatibus strategicis comprobabunt, quae ad actionem innovativam in Unione Europaea pertinent. Disputabunt etiam de rogatione, ut leges teloniales in Unione ad praesentia accommodentur, atque de progressu Melioris regulationis et de prioritatibus futuris in vita operaria opiniones proferent.
www.eu2006.fi/calendar/vko49/fr_FR/1147787670311/
CONCILIUM IUSTITIAE ET RERUM DOMESTICARUM (JHA) BRUXELLIS DIEBUS 4-5 M. DECEMBRIS
Ministri UE, quorum est negotia iustitiae et rerum domesticarum procurare, die Lunae sive pridie Nonas Decembres et die Mercurii sive Nonis Decembribus Bruxellas ad conventum Concilii ministerialis agendum congregabuntur. Concilio propositum est inter alias res ea confirmare, quae de Programmate Hagensi perficiendo iudicata sunt.
Die Lunae participes duce ministra iustitiae Leena Luhtanen de consulto generali consentire conabuntur, quod eo spectat, ut praeiudicia in alia UE civitate facta in nova causa criminali respiciantur. Idem ministri, quoad eius fieri potuerit, consultum generale de captivis transferendis comprobare et de administratione UE iurum fundamentalium condenda decernere studebunt.
Die Mercurii, cum Kari Rajamäki, minister a rebus domesticis, conventui praesidebit, primum constituetur, quae tempora regioni Schengenianae amplificandae praestituantur, deinde omnes revisiones Schengenianae, quae Austriacis et Finnis praesidentibus factae sunt, ad tempus aestimabuntur. Alia negotia, quae participibus praeterea approbanda erunt, sunt strategia custodiae confiniorum UE provehendae et iudicia de futuro ordinis Europol. Huc accedunt relationes earum quaestionum, quatenus strategia ad necessitudines exteras pertinens processerit et qualem successum strategia antiterroristica habuerit, item relatio de iis consiliis perficiendis, quibus propagatio radicalismi et conquisitio terroristarum impediantur. Concilium id quoque decernere conabitur, quibusnam rationibus pecunia rei servatoriae suppeditetur.
www.eu2006.fi/calendar/vko49/fr_FR/1147767576737/
PRAESIDENTIA DIE 8 M. DECEMBRIS DIURNARIOS CONVENIT
Die 8. m. Decembris hora 14.15 (GMT+1) primus minister Matti Vanhanen in programmate ‘Praesidentia diurnarios convenit' interfuturus ad quaestiones diurnariorum tam in televisione quam in www coram respondebit. Dum Finnia praesidentiam tenebit, illa emissio, quae per EbS (hoc compendio Europa per Satellitem indicatur) divulgabitur, semel in mense edetur et ab omnibus, qui accessum ad paginam interretialem aut EbS habent, videri poterit. Auctores programmatis sunt Praesidentia UE Finnorum, EbS, YLE sive Radiophonia Finnica Generalis.
CONSPECTUS RERUM LATINUS
Proximus conspectus Latine divulgabitur die Mercurii, tertio decimo m. Decembris.
