Conspectus rerum Latinus 14/2006
22 Nov 2006, 09:54
CONCILIUM A TRANSPORTATIONE, TELECOMMUNICATIONE ENERGIAQUE BRUXELLIS DIE 23 M. NOVEMBRIS
Concilium ab energia se ad politicam energiae futuram praeparat, quam ob rem ministri UE de rebus energiae responsales conventum agent disputaturi, quibusnam rationibus tam in Unione Europaea quam in aliis civitatibus cooperantibus ex energia maior utilitas capiatur et usus generum energiae se renovantium augeatur.
Conventui eius partis Concilii, cuius est de energia providere, praesidebit Mauri Pekkarinen, minister mercaturae et industriae Finniae.
Sessio aperta huius conventus ad horam 10.15 (GMT+1) praestituta et colloquium diurnariis edocendis, quod circiter hora 13.00 (GMT+1) initium capturum est, interretialiter aut coram aut in archivo posita videri possunt in www.eu2006.fi.
SUMMUS CONVENTUS UE-RUSSIA HELSINKII DIE 24 M. NOVEMBRIS
In summo conventu Unionis Europaeae et Russiae imprimis de cooperatione UE et Russiae in negotiis ad energiam, circumiecta, educationem, culturam, iustitiam resque domesticas pertinentibus agetur. In argumentis erunt etiam quaestiones internationales maximi momenti, e.g. condicio rerum in Irania, Proximo Oriente, Balcania Occidentali, Corea Septentrionali. Proprie autem participes consentire conabuntur, ut de nova pactione inter UE et Russiam adumbranda in consultationem veniatur. Qua pactione res commerciales et energicae late patentes continebuntur.
Legatis UE praeerit primus minister Matti Vanhanen, legatis autem Russiae praesidens Vladimir Putin. Intererunt eidem conventui a parte UE etiam José Manuel Barroso, praeses Commissionis, et Javier Solana, legatus magnae auctoritatis a communi politica extera et securitate.
Colloquium diurnariis edocendis, quod circiter hora 15.30 (GMT+2) initium capturum est, interretialiter aut coram aut in archivo positum videri potest in www.eu2006.fi.
http://www.eu2006.fi/calendar/vko47/en_GB/1159261767620/
SUMMUS CONVENTUS DE DIMENSIONE SEPTENTRIONALI HELSINKII DIE 24 M. NOVEMBRIS
UE, Russia, Norvegia Islandiaque, quae sodalicium Dimensionis septentrionalis constituunt, die 24 m. Novembris conventum habebunt. Eis propositum est Adumbrationem novam documenti dimensionis septentrionalis comprobare, quae in locum Documenti hodierni de hac re conscripti succedat. In novis tabulis dimensio septentrionalis in politicam communem convertetur, quae ab omnibus partibus inde ab anno 2007 ineunte respicietur.
A parte UE conventui intererunt Matti Vanhanen, primus minister Finniae, José Manuel Barroso, praeses Commissionis, Javier Solana, legatus magnae auctoritatis a communi politica extera et securitate. E Russia veniet praesidens Putin, e Norvegia autem primus minister Jens Stoltenberg et ex Islandia primus minister Geir Hilmar Haarde. Aderit etiam praesidens Finniae Tarja Halonen.
Colloquium diurnariis edocendis, quod circiter hora 15.30 (GMT+2) initium capturum est, interretialiter aut coram aut in archivo positum videri potest in www.eu2006.fi.
http://www.eu2006.fi/calendar/vko47/en_GB/1163593399449/
CONSPECTUS RERUM LATINUS
Proximus conspectus Latine divulgabitur die Mercurii, undetricesimo m. Novembris.
