Conspectus rerum Latinus 11/2006
01 Nov 2006, 11:14
VERONA IV – CONVENTUS DE TUTO COMMEATU DIEBUS 3-4 M. NOVEMBRIS
Ministri UE a re viaria quartum de tuto commeatu conventum Veronae diebus quarto et quinto mensis Novembris habebunt. Propositum est operam UE ad securitatem commeatus pertinentem fovere atque novas rationes procreare, quibus problematis occurratur. Finnia una cum Commissione Europaea et Italia de rebus in conventu agendis erit responsalis. Thema erit "Innovativi ad tutum commeatum accessus". Participes ex terris UE venient, praeterea ex Norvegia, Islandia, Helvetia, Civitatibus Unitis Americae, Russia, India.
Conventui praesidebit Susanna Huovinen, ministra commeatus et communicationis Finniae, atque Cesare de Piccoli, viceminister commeatus Italiae.
www.eu2006.fi/calendar/vko44/fr_FR/1147249780956/
CONCILIUM ECOFIN BRUXELLIS DIE 7 M. NOVEMBRIS
Concilium ad res oeconomicas et fiscales tractandas (ECOFIN) Bruxellis die septimo mensis Novembris hora 10.45 (GMT+1) habebitur. Concilio praesidebit Eero Heinäluoma, minister aerarii publici Finniae. Disceptabitur de sustentabilitate pecuniae publicae, minimis tributis consumptionis potionum alcoholicarum, conventiciis viatorum. Conventus ministerialis una cum terris associationis EFTA fiet hora 10.00 (GMT+1). Praecedet concilio ECOFIN conventus Gregis euronis, scilicet duodecim terrarum, quarum moneta communis est euro, die sexto m. Novembris.
Sessio aperta Concilii, quae habebitur hora fere 11.00 (GMT+1), et coetus diurnariis edocendis, qui ad horam 13.10 (GMT+1) praestitutus est, coram interretialiter videri possunt in www.eu2006.fi. Notate bene horam aestivam in UE proximo die Sabbati desisse. Hora Bruxellensis est in praesenti GMT+1 et Helsinkiensis hora GMT+2.
www.eu2006.fi/calendar/vko45/fr_FR/1147784983830/
CONCILIUM EXTRAORDINARIUM DE OCCUPATIONE, POLITICA SOCIALI, REBUS SANITARIIS ET CONSUMPTORIIS (EPSCO) BRUXELLIS DIE 7 M. NOVEMBRIS
Die septimo mensis Novembris Concilium de occupatione, politica sociali, rebus sanitariis et consumptoriis sessionem extraordinariam Bruxellis habebit, quae tota directivae de tempore operario dedicabitur. Finnia, quippe quae praesidentiam teneat, operam dabit, ut de illa directiva emendanda concordia inveniatur. Sessioni praesidebit Tarja Filatov, ministra Finniae operum et laborum.
Hora coetus diurnariis edocendis postea confirmabitur, itemque situs, ubi emissiones interretiales coram aut in archivo repositae praesto erunt.
www.eu2006.fi/calendar/vko45/fr_FR/1147792291729/
CONSPECTUS RERUM LATINUS
Proximus conspectus Latine divulgabitur die Mercurii, octavo m. Novembris.
