Conspectus rerum Latinus 10/2006
25 Oct 2006, 16:44
SUMMUS CONVENTUS UE-UCRAINA HELSINKII DIE 27 M. OCTOBRIS
Finnia hospita erit summo conventui Unionis Europaeae et Ucrainae, qui Helsinkii die Veneris 27 m. Octobris habebitur. Legatis UE praeerit primus minister Matti Vanhanen, legatis Ucrainae autem praesidens Victor Yushchenko. A parte Unionis Europaeae huic conventui intererunt etiam José Manuel Barroso, praeses Commissionis Europaeae, et Benita Ferrero-Waldner, membrum Commissionis Europaeae. Pro Finnis praesidentiam obtinentibus aderunt Erkki Tuomioja, minister a rebus exteris Finniae, et Paula Lehtomäki, ministra commercii et progressus.
Conventus Helsinkiensis, cum id acturus sit, ut relationes politicae et oeconomicae inter Unionem Europaeam et Ucrainam intercedentes corroborentur, praecipue rationibus bilateralibus operam dabit. In his erunt res ad energiam pertinentes, politica Europaeorum vicina, negotia internationalia maximi momenti. Alterum propositum principale erit aestimare, quem ad modum res in summo UE et Ucrainae conventu anno 2005 inceptae processerint.
Colloquium diurnariis de conventu edocendis, quod hora 14.00 (GMT+3) instituetur, interretialiter coram aut in archivo repositum videri potest in eu2006.fi.
www.eu2006.fi/calendar/vko43/en_GB/1159961562645/
CONCILIUM A SODALITATE PERMANENTI UE ET RUSSIAE (PPC) DIEBUS 29-30 M. OCTOBRIS HELSINKIUM CONGREGABITUR
Quintus conventus Concilii a sodalitate permanenti UE et Russiae atque is de iustitia et rebus domesticis (PPC JHA) diebus 29-30 m. Octobris Helsinkii agetur. Conventus maxime nitetur, ut Unio Europaea et Russia cooperationem de libertate, securitate, iustitia firmare et provehere pergant. Insuper accuratissime examinabitur, quatenus itinerarium spatii communis ad libertatem, securitatem, iustitiam pertinentis inter utramque partem ad effectum perductum sit. In argumentis, de quibus participes disceptabunt, erunt commeatus hominum, terrorismus, criminalitas ordinata, cooperatio in rebus civilibus criminalibusque iudicialis.
Colloquium diurnariis edocendis, quod die Lunae, 30 m. Octobris, hora 15.00 (GMT+3) instituetur, interretialiter coram aut post eventum in archivo repositum videri potest in eu2006.fi.
www.eu2006.fi/calendar/vko43/en_GB/1160648455975/
CONSPECTUS RERUM LATINUS
Proximus conspectus Latine divulgabitur die Mercurii, Kalendis Novembribus.
