Conspectus rerum Latinus 6/2006
27 Sep 2006, 11:12
AGRICULTURA EUROPAEA PERICULIS FUTURIS SUPERANDIS OPERAM DAT
Ministri Unionis Europaeae de agricultura responsales conventui inofficiali triduano in urbe Oulu habito finem fecerunt. In eo, dum maxime ad pericula rei rusticae imminentia animum intendunt, exemplar agriculturae Europaeae considerabant et aestimabant. Disceptationes in libello a Praesidentia iam antea praeparato positae erant. Juha Korkeaoja, minister agriculturae et piscationis Finniae, qui conventui praesidebat: "Res rustica Europaea", inquit, "magnis periculis obiecta est, quam ob rem nobis ad ea superanda viribus unitis laborandum est. Quae quamvis ita sint, certo stabilitatis gradu opus est, neque prudentis est politicam nimis saepe mutare."
http://www.eu2006.fi/calendar/vko38/fr_FR/1147177992179/
CONCILIUM COMPETITIVITATIS BRUXELLIS DIE 25 M. SEPTEMBRIS DE POLITICA INNOVATIVA AGEBAT
In conventu Concilii competitivitatis, acto Bruxellis die Lunae, vicesimo quinto m. Septembris, ministri, quid de politica UE innovativa eiusque competitivitate sentirent, in medium proferebant. Praeterea Commissio communicatum de politica innovativa divulgavit; Finnia, quippe quae Praesidentiam obtineat, consilia hoc argumentum disceptandi mensibus futuris proponet.
http://www.eu2006.fi/calendar/vko39/fr_FR/1147787670311/
CONVENTUS MINISTRORUM A REBUS EXTERIS UE ET NOVAE ZELANDIAE DIE 25 M. SEPTEMBRIS
Winston Peters, minister Novae Zelandiae, conventui ministrorum a rebus exteris UE et Novae Zelandiae die 25 m. Septembris habito interfuit. In argumentis erant cooperatio Unionis Europaeae et Novae Zelandiae atque res ad regionem Asiae et Oceani Pacifici pertinentes. Ut fieri solet, partes Unionis Europaeae agebat Triga sive ternitas ex Civitate UE praesidente, Secretariatu Concilii, Commissione constans.
http://www.eu2006.fi/calendar/vko39/fr_FR/1152794148416_1/
CONVENTUS MINISTRORUM A REBUS EXTERIS UE ET AUSTRALIAE DIE 26 M. SEPTEMBRIS
Alexander Downer, minister Australiae, conventui ministrorum a rebus exteris UE et Australiae die 25 m. Septembris habito interfuit. In illo cenventu, cui praefuit Erkki Tuomioja, minister a rebus exteris Finniae, non solum de cooperatione UE et Australiae agebatur, sed etiam quaestiones securitatem regionis Asiae attingentes et res actuales internationales tractabantur. Ut fieri solet, partes Unionis Europaeae agebat Triga sive ternitas ex Civitate UE praesidente, Secretariatu Concilii, Commissione constans.
http://www.eu2006.fi/calendar/vko39/fr_FR/1152793848503_1/
CONSPECTUS RERUM LATINUS
Proximus conspectus Latine divulgabitur die Mercurii, quarto m. Octobris.
