Conspectus rerum Latinus 5/2006
20 Sep 2006, 14:40
MINISTRI IUSTITIAE ET RERUM DOMESTICARUM IN URBE TAMPERE DIEBUS 20-22 M. SEPTEMBRIS
Ministri iustitiae et rerum domesticarum Unionis Europaeae in urbe Tampere a die 20 usque ad diem 22 mensis Septembris conventum inofficialem habebunt. Praesidebunt conventui Leena Luhtanen, ministra iustitiae Finnorum, et Kari Rajamäki, minister rerum domesticarum.
Ministra Luhtanen disputationem de futura politica iudiciali UE moderabitur. Propositum Praesidentiae est systema decernendi reformare, quod in forma sua hodierna cooperationem in iustitia et rebus domesticis impedit.
Die Iovis ministri inter se considerabunt, quo modo strategia Unionis terrorismo obsistendi melius efficiatur. Minister Rajamäki de moderatione immigrationis in UE verba faciet et consilium praesidentiale solidaritatis in Europa augendae praesentabit, quod scilicet attinet ad immigrationem, custodiam limitum, politicam asylum conferendi.
Coetus diurnariis edocendis illius conventus horis 12.30 et 17.45 (GMT+3) die Iovis, 21 m. Septembris, atque hora 13.00 (GMT+3) die Veneris, 22 m. Septembris, interretialiter coram aut in archivo repositi videri possunt in situ eu2006.fi.
http://www.eu2006.fi/calendar/vko38/fr_FR/1147173887788/?calYear=2006&calMonth=8
SEXTUS DE INDUSTRIA CONVENTUS MINISTRORUM UNIONIS EUROPAEAE ET NATIONUM MEDITERRANEARUM RHODI DIEBUS 21-22 M. SEPTEMBRIS
Ministri de industria in UE et in terris Mediterraneis responsales in insulam Rhodum Graeciae diebus 21-22 m. Septembris 2006 convenient. Etiam repraesentatores organizationum industrialium aderunt. Argumentum erit globalizatio societatibus Unionis Europaeae atque nationibus Mediterraneis imminens. Conventui praesidebunt Mauri Pekkarinen, minister commercii et industriae Finnus, atque Dimitris Siouflas, Graecus minister progressus.
http://www.eu2006.fi/calendar/vko38/fr_FR/1147176245511/?calYear=2006&calMonth=8
MINISTRI IN URBE OULU DIEBUS 24-26 M. SEPTEMBRIS CONVENIENT, UT DE EXEMPLARI AGRICULTURAE EUROPAEO DISPUTENT
Conventus inofficialis ministrorum agriculturae exemplar politicae agrariae in UE selectum aestimabit et praecipuam operam periculis rei rusticae imminentibus impendet. Hoc argumentum partem facit thematis generalis utriusque anni 2006 Praesidentiae, quae est agricultura innovativa, sustentabilis competitivaque in vitali Europa rurali. Huic conventui praesidebit Juha Korkeaoja, minister agriculturae et silviculturae.
Coetus diurnariis edocendis hora 12.30 (GMT+3) die Martis 26 m. Septembris interretialiter coram aut in archivo repositus videri potest in situ eu2006.fi.
http://www.eu2006.fi/calendar/vko38/fr_FR/1147177992179/?calYear=2006&calMonth=8
CONSPECTUS RERUM LATINUS
Proximus conspectus Latine divulgabitur die Mercurii, vicesimo septimo m. Septembris.
Conspectus rerum latinus: www.eu2006.fi/newsletters_fr/
